ಕನಸು ಕಾಣೋ ಕಣ್ಣಿನಲ್ಲಿ ಶ್ರಮದ ನೆರಳು ಸುಳಿಯೋದಿಲ್ಲ (ಪ್ಲಸ್ ಪಾಯಿಂಟ್)

ಖ್ಯಾತ ಬರಹಗಾರ, ಬೆಳಗೆರೆಯವರು ಕನಸಿನ ಬಗೆಗೊಂದು ಚಂದದ ಸಾಲು ಬರೀತಾರೆ. 'ವಯಸ್ಸಿಗೆ ತಕ್ಕಂತೆ ಬದಲಾಗುವ, ವ್ಯಕ್ತಿತ್ವಕ್ಕೆ ತಕ್ಕಂತೆ ರೂಪುಗೊಳ್ಳುವ, ಅಭಿರುಚಿಗೆ ತಕ್ಕಂತೆ ಆಕಾರ ಪಡೆದುಕೊಳ್ಳುವ, ಕೇವಲ ನಮ್ಮ ಪ್ರಯತ್ನ ಮತ್ತು ಪರಿಶ್ರಮ, ಶ್ರದ್ಧೆಗಳಿಂದ ಮಾತ್ರ ಸಾಕಾರಗೊಳ್ಳುವ ಅತಿದೊಡ್ಡ ಸುಖದ ಹೆಸರೇ ಕನಸು' ಅಂತ. ಕನಸೆಂದರೆ ಹೀಗೆಯೆ. ಅದು ಸಾಧನೆಗೆ ಬೇರು. ಛಲಕ್ಕೆ ನೆಪ. ಪರಿಶ್ರಮಕ್ಕೆ ಪ್ರೇರಣೆ. ಗೆಲುವಿಗೆ, ಸ್ಫೂರ್ತಿಗೆ ಇರುವ ಅದ್ಭುತ ಟಾನಿಕ್ಕು!

ಅಪ್ಪಟ ಕನಸುಗಾರ ಇರುವ ರೀತಿಯೇ ಹಾಗೆ. ಅವನಿಗೆ ಹೊಟ್ಟೆಯ ಬಗ್ಗೆ ಕಾಳಜಿ ಇರಲಾರದು. ನಿದ್ದೆಯ ಬಗ್ಗೆ ಚಿಂತೆಯೇ ಬಾರದು. ಅಷ್ಟೇ ಯಾಕೆ ಮೈಕೈ ಮೆತ್ತಗಾಗುವಷ್ಟು ದುಡಿದು ಬಂದ ಕನಸುಗಾರ ಇನ್ನೊಂದಿಷ್ಟು ಕೆಲಸಗಳನ್ನು ಮೇಲೆಳೆದು ಅದರಲ್ಲಿ ತಲ್ಲೀನನಾಗಿ ಹೋಗುತ್ತಾನೆಯೇ ವಿನಹ, ಅವನ ಬಳಿ ಶ್ರಮದ ನೆರಳೂ ಕೂಡ ಸುಳಿಯಲಾರದು!

ಮೈ ಸೋತು, ಕಾಲು ಕುಸಿದು ಬಿದ್ದಾಗಲೂ ಕನಸಿನ ಬೆನ್ನು ಬೀಳೋಕೆ, ಹೊನ್ನಿನ ಕನಸನ್ನು ನನಸು ಮಾಡೋಕೆ ತಾನೇ ಚೈತನ್ಯದ ಹೆಗಲು ಹಿಡಿದು ಮತ್ತೆ ಎದ್ದು ನಿಲ್ಲುತ್ತಾನೆ ನೋಡಿ, ಆತ ನಿಜವಾದ ಕನಸುಗಾರ! ನಾವೂ ಅಂತ ಕನಸುಗಾರನಾಗಬೇಕು, ಕನಸಿನ ಬೆನ್ನು ಬೀಳಬೇಕು. ಹಾಗೆ ಕನಸಿನ ಬೆನ್ನು ಬಿದ್ದು ಸಾಧನೆಯ ಒಂದೊಂದೇ ಮೆಟ್ಟಿಲುಗಳನ್ನು ತುಳಿದು ಸಂಭ್ರಮಿಸಬೇಕು. ಸಾಧಿಸಿ ತೋರಿಸಬೇಕು.

-ಸದಾ ಸಕಲೇಶಪುರ.