ಕನಸುಗಳನ್ನು ಹೆರುವಾಸೆಗೆ ಕಣ್ಣಾಗುತ್ತೀಯಾ ಪ್ಲೀಸ್? (ಒ'ಲವ್‌'ವಿನ ಓಲೆ)

ಓಯ್ ಕೋತಿ,
'ಕ್ಯಾ...ಮಿಸ್ಟ್ರಿ...ಹುಡ್ಗೀ..' ಅಂತ ನೀನು ರೇಗಿಸುವಾಗೆಲ್ಲಾ ರೇಗುವ ನಾಟಕವಾಡುತ್ತೇನಾದರೂ ಒಳಗೊಳಗೆ ಅದೆಷ್ಟು ಹಿಗ್ಗುತ್ತೇನೆ ಗೊತ್ತಾ? ನಂಗೆ ನೀ ಕರೆವ 'ಕ್ಯಾಮಿಸ್ಟ್ರಿ' ಪದ ಇಷ್ಟ. ನನ್ನೀ ಎಂಎಸ್ಸಿ ಕೆಮಿಸ್ಟ್ರಿ ಸಬ್ಜೆಕ್ಟಿನಲ್ಲಿ ಆಗಾಗ ಬಂದುಹೋಗೋ ಈ ಕೆಮಿಸ್ಟ್ರಿಗೆ ಬದಲಾಗಿ 'ಕ್ಯಾಮಿಸ್ಟ್ರಿ' ಪದವೇ ಇರಬಾರದಿತ್ತೇ ಅಂತ ಎಷ್ಟೋಸಾರಿ ಅನ್ನಿಸಿದ್ದೂ ಇದೆ. ಮೊನ್ನೆ ಲ್ಯಾಬಿನಲ್ಲಿ ರಾಸಾಯನಿಕ ದ್ರವವನ್ನು ಒಂದಕ್ಕೊಂದು ಸೇರಿಸಿ ರಿಯಾಕ್ಷನ್ ನೋಡುವಾಗ್ಲೂ ನೀನವತ್ತು 'ನಮ್ಮಿಬ್ಬರ ಕೆಮಿಸ್ಟ್ರಿ ಹ್ಯಾಗಿದೆ?' ಅಂತ ಕೇಳಿದ್ದನ್ನು ನೆನಪು ಮಾಡಿಕೊಂಡು ಮೈ ಮರೆತು ನಕ್ಕು ಮ್ಯಾಮ್ ಕೈಲಿ ಬೈಸಿಕೊಂಡೆ ಗೊತ್ತಾ? 

ಮಾತೆತ್ತಿದಾಗೆಲ್ಲಾ ನಂಗೆ ಡಝನ್ ಮಕ್ಳನ್ನು ಹೆತ್ಕೊಟ್ಬಿಡು ಸಾಕು ಅಂತ ಪೋಲಿ ರಿಕ್ವೆಸ್ಟ್ ಮಾಡ್ಕೋತೀಯಲ್ಲ ಪಾಪಿ!. ಮಕ್ಕಳಿರಬೇಕು ಮನೆತುಂಬ ಅಂತ ನಂಗೂ ಆಸೇನೆ, ಆದ್ರೆ ಹಾಗೆ ವರುಷಕ್ಕೊಂದರಂತೆ ಡಝನ್ ಮಕ್ಳನ್ನು ಹೆತ್ತು ಕೈಗಿಡೋದು ನನ್ನೀ ಸಣಕಲು ದೇಹಕ್ಕೆ ಸಾಧ್ಯಾನ ಹುಚ್ಚಪ್ಪಾ!?

ಅದ್ಯಾಕೋ ಗೊತ್ತಿಲ್ಲ, ನಂಗೂ ಇತ್ತೀಚೆಗೆ ಡಝನ್‌ಗಟ್ಟಲೆ ಹೆರುವ ಆ(ಕಾ)ತುರ ಹೆಚ್ಚಾಗ್ತಿದೆ. ಅದ್ಕೆ ಇವತ್ ಒಂದ್ ನಿರ್ಧಾರಕ್ಕೆ ಬಂದಿದ್ದೇನೆ. ನಾನು ಮೆಡಿಕಲ್ ಕಾಲೇಜಿಗೆ ಸೇರಿ ಚೆನ್ನಾಗಿ ಓದಬೇಕು. ನಾಳೆ ಡಾಕ್ಟರ್ ಅಂತ ಕರೆಸಿಕೊಳ್ಳಬೇಕು. ಬಡ ಅವ್ವಂದಿರು ಅತ್ತುಕೊಂಡು ಎತ್ತಿಕೊಂಡು ಬರುವ ಕಂದಂಮ್ಮಗಳಿಗೆಲ್ಲ ಅಕ್ಕರೆಯ ಟ್ರೀಟ್ಮೆಂಟ್ ನೀಡಬೇಕು, ಬಡವರಿಗೆಲ್ಲಾ ನೆರವಾಗಬೇಕು. ಕಣ್ಣಿಲ್ಲದವರಲ್ಲೂ ಕನಸುಗಳನ್ನು ಬಿತ್ತಬೇಕು. ಬಡವರೆಲ್ಲರಲ್ಲಿ ಹಾರೈಸಿಕೊಂಡು ಲೆಕ್ಕವಿಲ್ಲದಷ್ಟುಸಾರಿ ಖುಷಿಯಲ್ಲಿ ಕಣ್ಣು ತೋಯಿಸಿಕೊಳ್ಳಬೇಕು. ಟ್ರೀಟ್ಮೆಂಟ್ ನೆಪದಲ್ಲಿ ಬಡವರನ್ನು ದೋಚಿ ವಂಚಿಸುವ ಅರ್ಥಪಿಶಾಚಿ ಡಾಕ್ಟರ್‌ಗಳ ಸಾಲಿಗೆ ಸೇರದೆ, ವೈದ್ಯಕೀಯ ಸೇವೆಯನ್ನು ದೇವರು ತಲೆದೂಗುವ ಕೆಲಸಗಳ ಸಾಲಿಗೆ ತಂದು ನಿಲ್ಲಿಸಬೇಕು ಎಂದೆಲ್ಲಾ ನನ್ನೊಳಗೆ ಸಾಲು ಸಾಲು ಕನಸುಗಳಿವೆ. ಆ ಮನದ ಬಸಿರಿನ ಒಳಗಿರುವ ಕನಸುಗಳನ್ನೆಲ್ಲಾ ಒಂದೊಂದಾಗಿ ಹೆರಬೇಕು. ಹೆತ್ತ ಆ ಕನಸಿನ ಕೂಸುಗಳಿಗೆಲ್ಲಾ ನನಸು-1, ನನಸು-2, ನನಸು-3.... ಹೀಗೆ ಸಾಲಾಗಿ ಹೆಸರಿಡಬೇಕೆಂದುಕೊಂಡಿದ್ದೇನೆ, ಪ್ರೋತ್ಸಾಹಿಸುತ್ತೀಯಾ? ಡಾಕ್ಟರ್ ಆಗಬೇಕನ್ನೋ ನನ್ ಹಂಬಲವನ್ನು ಕೈ ಹಿಡಿದು ಮುನ್ನಡೆಸುತ್ತೀಯಾ? ಸಾಧನೆಯ ಕನಸುಗಳನ್ನು ಹೆರುವ ನನ್ನಾಸೆಗೆ ಕಣ್ಣಾಗುತ್ತೀಯಾ ಗೆಳೆಯಾ ಪ್ಲೀಸ್...

-ಪ್ರವುಶಿ