ಗ್ಯಾಸ್ ಸ್ಟವ್‌ ಜ್ವಾಲೆ ಬೆಳಕನ್ನೇಕೆ ಬೀರುವುದಿಲ್ಲ ಗೊತ್ತೇ?

ನೀವೀಗ ಕಿಚನ್‌ಲ್ಲಿ ಸ್ಟವ್ ಹಚ್ಚಿಟ್ಟುಕೊಂಡು ನಿಂತಿದ್ದೀರಿ ಅಂತಿಟ್ಟುಕೊಳ್ಳಿ. ಕೆಇಬಿಯವರ ಕೃಪೆಯಿಂದ ಸಡನ್ನಾಗಿ ಕೆರೆಂಟ್ ಹೋಗ್ಬಿಟ್ತು ಅನ್ನಿ. ಸ್ಟವ್ ಉರಿಯುತ್ತಿದ್ದರೂ ಕಿಚನ್ ತುಂಬಾ ಕತ್ತಲು ಆವರಿಸಿಬಿಡುತ್ತದೆ. ಮತ್ತೆ ಕಿಚನ್‌ಗೆ ಬೆಳಕು ಹಬ್ಬಲು ನೀವೊಂದು ಮೋಂಬತ್ತಿ ಹಚ್ಚಿಡಬೇಕಷ್ಟೆ. ಯಾಕೆ ಹೀಗೆ?!

ಹೀಗಾಗುವುದರ ಹಿಂದೊಂದು ವೈಜ್ಞಾನಿಕ ಕಾರಣವಿದೆ. ಅದೇನೆಂದರೆ, ಅನಿಲ ರೂಪದಲ್ಲಿರುವ ಯಾವುದೇ ಇಂಧನ ಉರಿಯುವಾಗ ಜ್ವಾಲೆ ಉಂಟಾಗುತ್ತದೆ. ಹಾಗೆಯೇ ಗ್ಯಾಸ್ ಸ್ಟವ್ವಿನಲ್ಲಿ ಇಂಧನವಾಗಿರುವ ಪ್ರೋಪೇನ್ ಅನಿಲ ಉರಿಯುವಾಗ, ಇಂಗಾಲ ಮತ್ತು ಇಂಗಾಲಕ್ಕೆ ಸಂಬಂಧಪಟ್ಟ ಅನೇಕ ರಾಸಾಯನಿಕ ವಸ್ತುಗಳನ್ನು ಅದು ಬಿಡುಗಡೆ ಮಾಡುತ್ತದೆ. ಆ ವಸ್ತುಗಳು ಹೆಚ್ಚಿನ ಉಷ್ಣತೆಯ ಜ್ವಾಲೆಯಲ್ಲಿ ಸಂಪೂರ್ಣವಾಗಿ ದಹಿಸಿ ಹೋಗುವಾಗ ಅದರಿಂದ ಹೊರಸೂಸಿದ ವಿಕಿರಣಗಳು ನೀಲಿ ಬಣ್ಣದ ಬೆಳಕನ್ನು ಹರಡುತ್ತವೆ. ಆ ನೀಲಿ ಬಣ್ಣದ ಬೆಳಕನ್ನು ಅಡುಗೆ ಮನೆಯ ಗೋಡೆಗಳು ಅಷ್ಟಾಗಿ ಪ್ರತಿಫಲಿಸಲು ಸಾಧ್ಯವಿಲ್ಲ.

ಆದರೆ ಮೋಂಬತ್ತಿಗಳಲ್ಲಿ ಹಾಗಲ್ಲ. ಮೋಂಬತ್ತಿಗಳನ್ನು ಪ್ಯಾರಾಫಿನ್ ಮೇಣದಿಂದ ತಯಾರಿಸುತ್ತಾರೆ. ರಾಸಾಯನಿಕವಾಗಿ ಹೇಳುವುದಾದರೆ ಪ್ಯಾರಾಫಿನ್ ಒಂದು ಹೈಡ್ರೋಕಾರ್ಬನ್ ಸಂಯುಕ್ತ ವಸ್ತುವಾಗಿದೆ. ಮೋಂಬತ್ತಿ ಉರಿಯುವಾಗ ಜಲಜನಕ (ಹೈಡ್ರೋಜನ್) ಉರಿದು ಹೋಗುತ್ತದೆ. ಆದರೆ ಇಂಗಾಲದ ಸಾಕಷ್ಟು ಕಣಗಳು ಪೂರ್ತಿಯಾಗಿ ಉರಿಯದೆ ಕೆಂಡದಂತೆ ಹೊರಬರುತ್ತದೆ. ಕಡಿಮೆ ಶಾಖದಲ್ಲಿ ಈ ಕಣಗಳು ಹಳದಿ ಬೆಳಕಿನ ಪ್ರಕಾಶವನ್ನು ಪ್ರದರ್ಶಿಸುತ್ತವೆ. ಮೋಂಬತ್ತಿಯಿಂದ ಬೆಳಕು ಹಬ್ಬವುದರ ಮರ್ಮ ಇದೇ.