(ಗೊತ್ತಾ ವಿಷ್ಯಾ?!) ವರ್ಷವಿಡೀ ನಿಂತುಕೊಂಡೇ ತಪಸ್ಸಾಚರಿಸುವ ವಿಚಿತ್ರ ಸಾಧುಗಳಿವರು!

ಹೆಚ್ಚೂಂದ್ರೆ ನಾವೆಷ್ಟು ಹೊತ್ತು ನಿಂತುಕೊಂಡಿರಬಹುದು ಹೇಳಿ? 1ಗಂಟೆ? 4 ಗಂಟೆ? 10 ಗಂಟೆ? 12ಗಂಟೆಗಳ ಕಾಲ ಹೆಂಗೋ ಹಟಕ್ಕೆ ಬಿದ್ದವರ ಹಾಗೆ ನಿಂತುಕೊಂಡೇ ಬಕ ಪಕ್ಷಿಯ ಹಾಗೆ ಅವುಡುಗಚ್ಚಿ ಒಂದು ತಪಸ್ಸು ಮಾಡಿಬಿಡಬಹುದು. 

ಆದರೆ ದಿನಗಟ್ಟಲೆ, ವಾರಗಟ್ಟಲೆ, ತಿಂಗಳುಗಟ್ಟಲೆ ಅಷ್ಟೇಯಾಕೆ ವರ್ಷಗಟ್ಟಲೆ ನಿಂತೇ ಕಾಲ ಕಳೆಯುವ, ತಪಸ್ಸು ಮಾಡುವವರ ಬಗ್ಗೆ ಕೇಳಿದ್ರೆ ನೀವೇನು ಅಂದುಕೊಳ್ತೀರೋ ಏನೋ!

ಹಗಲು-ರಾತ್ರಿ ಎನ್ನದೆ ಯಾವಾಗಲೂ ನಿಂತುಕೊಂಡೇ ಇರುವ ಬಾಬಾಗಳು ಇದ್ದಾರೆ. ಇವರು ಹಿಂದೂ ಸಾಧುಗಳ ಒಂದು ಪಂಥಕ್ಕೆ ಸೇರಿದ್ದು, ಇವರನ್ನು ಖರೇಶ್ವರಿಗಳು ಅನ್ನುತ್ತಾರೆ. ಆಧ್ಯಾತ್ಮಿಕ ಜ್ಞಾನವನ್ನು ಪಡೆಯುವುದಕ್ಕೋಸ್ಕರ ತಮಗೆ ತಾವೇ ವಿಧಿಸಿಕೊಳ್ಳುವ ಈ ದೈಹಿಕ ಶಿಕ್ಷೆಯನ್ನು ಅವರು ತಪಸ್ಸೆಂದು ಪಾಲಿಸುತ್ತಾರೆ.

ಈ ಪ್ರತಿಜ್ಞೆಯ ಬಗ್ಗೆ ನಿಖರವಾದ ಮಾಹಿತಿಯಿಲ್ಲ. ಕೆಲವು ಖರೇಶ್ವರರು ತಪಸ್ಸನ್ನು 12 ವರ್ಷಗಳ ಕಾಲ ಪಾಲಿಸಿದರೆ ಇನ್ನು ಕೆಲವರ ಪ್ರತಿಜ್ಞೆಗೆ ನಿರ್ದಿಷ್ಟ ಅವಧಿಯಿಲ್ಲ. ಹಿಂದೆಲ್ಲಾ ಖರೇಶ್ವರರು ಬಯಲಿನಲ್ಲಿ ವೃಕ್ಷದ ಕೆಳಗೆ ನಿಂತುಕೊಂಡು ಈ ತಪಶ್ಚರ್ಯನ್ನು ಕೈಗೊಳ್ಳುತ್ತಿದ್ದರು. ಯೋಗದ ವೃಕ್ಷಾಸನದಲ್ಲಿ ಇದರ ಸಂಬಂಧ ಇರಬಹುದು ಎನ್ನಲಾಗುತ್ತದೆ. 
-ಸದಾ ಸಕಲೇಶಪುರ.