ಅವನ ಪತ್ರ

ಮತ್ತೆ ‘ಅವನ’ ಪತ್ರ ಬಂದಿತ್ತು. ಅವಳನ್ನು ಭಾವನಾ ಲೋಕದಲ್ಲಿ ತೇಲಿಸುವ ಪತ್ರ. ‘ಅವಳು’ ಯಾವಾಗಲೂ ಬಲು ಕಾತರದಿಂದ ನಿರೀಕ್ಷಿಸುವ ಅದೇ ಹುಡುನ ಪತ್ರ ಕೆಲ ದಿನಗಳ ನಂತರ ಬಂದಿತ್ತು. 

ಒಂದು ಕ್ಷಣ ಮನವೆಲ್ಲ ಏನೋ ಉಲ್ಲಾಸ ತುಂಬಿಕೊಂಡ ಹಾಗಾಯ್ತು ಅವಳಿಗೆ. ಅವನ ಪತ್ರ ಕೈಯಲ್ಲಿರಲು ಅದೇನೋ ಕುತೂಹಲ, ಕಾತರ, ಉತ್ಸಾಹ, ಪುಳಕ, ಸಣ್ಣದಾಗಿ ನಡುಕ ಬೇರೆ. ಭಾವನೆಗಳನ್ನು ಕೆದಕುವ ಅವನ ಪತ್ರ ಅವಳಲ್ಲಿ ಪ್ರತೀ ಬಾರಿಯೂ ವಿಚಿತ್ರ ಅನುಭವ ತಂದುಬಿಡುತ್ತಿತ್ತು. ಸದಾ ಮಂದಹಾಸ ಬೀರುವ ಅವನ ಮುಖವನ್ನೊಮ್ಮೆ ಜ್ಞಾಪಿಸಿಕೊಂಡವಳೇ ತಾನೂ ಸಣ್ಣದಾಗಿ ನಕ್ಕು ಮೆಲ್ಲಗೆ ಪತ್ರ ತೆರೆದಳು.

‘ಒಲವಿನ ಗೆಳತಿ ಸುಮ, ನಿನ್ನ ನಿಜವಾದ ಹೆಸರು ಬೇರೆಯೇ ಇದ್ದರೂ ಮೊದಲಿನಿಂದಲೂ ನಿನ್ನನ್ನು ಸುಮ ಎಂದೇಕೆ ಕರೆಯುತ್ತಿದ್ದೇನೆ ಎಂದು ನೀನು ಯೋಚಿಸಿರಬಹುದು. ಅದ್ಯಾಕೋ ಗೊತ್ತಿಲ್ಲ; ಹೂವಿನಂತೆ ಮುದ್ದಾಗಿರುವ, ಸುಮದಂತ ಮೃದು ಮನಸ್ಸಿನ ನಿನ್ನನ್ನು ಸುಮ ಎನ್ನುವ ಹೆಸರಿನಿಂದಲೇ ಕರೆಯಬೇಕೆನಿಸಿತು. ಇತ್ತೀಚೆಗಂತೂ ನೀನ್ಯಾಕೋ ಪದೇ ಪದೇ ನೆನಪಾಗುತ್ತಿದ್ದೀಯ. ಈ ಕ್ಷಣ ನೀನು ಮನಸ್ಸಿಗೆ ಇನ್ನೂ ಹತ್ತಿರವಾಗುತ್ತಿದ್ದೀಯ ಎಂದೆನಿಸುತ್ತಿದೆ. ನಿನ್ನೊಂದಿಗೆ ಕಳೆದ ಆ ಕೆಲವೇ ಕೆಲ ಕ್ಷಣಗಳು, ಆ ನಿನ್ನ ನಗು, ಮುತ್ತುಗಳುದುರಿದಂತೆ ಸೊಗಸಾಗಿ ಎದೆಗಿಳಿಯುವ ನಿನ್ನ ಮಾತುಗಳನ್ನು ಮತ್ತೆ ಮತ್ತೆ ಕೇಳುತ್ತಲೇ ಕೂತುಬಿಡಬೇಕನ್ನಿಸುತ್ತೆ. ನನಗೇ ಗೊತ್ತಿಲ್ಲದಂತೆ ನಿನ್ನ ಪ್ರೀತಿಯ ಮಧುರವಾದ ಅನುಭವ ಎದೆಯೊಳಗೆ ಕಚಗುಳಿಯಿಟ್ಟಂತೆ ಈಚೀಚೆಗೇಕೋ ಭಾಸವಾಗತೊಡಗಿದೆ. ನಿನ್ನ ಪ್ರೀತಿಯೆಂಬ ಹಿತವಾದ ಬಂಧನದಲ್ಲಿ ನಾನಿದ್ದೇನೋ ಎಂದು ನನಗೆ ಅನ್ನಿಸತೊಡಗಿದೆ. ನಿನ್ನಿಂದ ದೂರ ಹೋಗಬೇಕು ಅಂದುಕೊಂಡಷ್ಟೂ ನಿನಗೆ ಇನ್ನೂ ಹತ್ತಿರವಾಗುತ್ತಿದ್ದೇನೋ ಎಂಬ ಅರಿವೀಗ ಬಲವಾಗತೊಡಗಿದೆ.’

ಎಂದು ಮುದ್ದಾಗಿ ಪೋಣಿಸಿದ ಅವನ ಅಕ್ಷರಗಳನ್ನು ಬೆರಗು, ಕಾತರಭರಿತ ಕಣ್ಣುಗಳಿಂದ ಓದುತ್ತಲೇ ಅವಳು ರೋಮಾಂಚನಗೊಂಡಳು. ಈ ಮೊದಲೇ ಅವನಿಗಾಗಿ ಹಂಬಲಿಸುತ್ತಿದ್ದ ಅವಳು ತುಟಿಯಂಚಿನವರೆಗೂ ಬಂದಿದ್ದ ಹೃದಯದ ಮಾತುಗಳನ್ನು ಅವನಲ್ಲಿ ಹೇಳದೆ ಚಡಪಡಿಸಿದ್ದಳು. ಇವತ್ತು ಅವನ ಪತ್ರದಿಂದಲೇ ಅವನ ಅಂತರಾಳ ಅರಿತ ಇವಳಿಗೆ ಅದ್ಯಾಕೋ ಖುಷಿಯಲ್ಲಿ ಕಣ್ಣಂಚು ಪಸೆಯಾಡಿತು. ಒಂದು ಕ್ಷಣ ಜಗತ್ತೇ ಮರೆತು ಹೋದಷ್ಟು ಹಿಗ್ಗು ಅವಳನ್ನಾವರಿಸಿತು. ಪತ್ರ ಹಿಡಿದಿದ್ದ ಕೈಗಳೇಕೋ ಸಣ್ಣದಾಗಿ ಕಂಪಿಸುತ್ತಿದ್ದವು. ನೋಟ ಮತ್ತೆ ಅಕ್ಷರಗಳ ಮೇಲೆ ಹರಿಹಾಡತೊಡಗಿತು.  

‘ಅನುದಿನವೂ ಬಿಡದೆ ಕೊರೆಯುತ್ತಿದ್ದ ಈ ಮನದ ಭಾವನೆಯನ್ನು ಇವತ್ತು ನಿನ್ನಲ್ಲಿ ಹೇಳಲೇಬೇಕೆನಿಸಿತು. ಯಾಕೆಂದರೆ ಇನ್ನೆರಡು ದಿನಗಳಲ್ಲಿ ನಾನು ದೂರದೂರಿಗೆ ಹೋಗುತ್ತಿರುವುದರಿಂದ ಮತ್ತೆ ಹೇಳಬೇಕೆನಿಸಿದರೂ ಅದಕ್ಕೆ ಅವಕಾಶ ಸಿಗಲಾರದು ಅನ್ನಿಸಿತು. ಇದೇ ಕಾರಣಕ್ಕೆ ಕಾಡುವ ಮನದ ತುಮುಲವನ್ನೆಲ್ಲಾ ಇವತ್ತು ನಿನ್ನೊಂದಿಗೆ ಹರವಿಕೊಂಡುಬಿಟ್ಟೆ. ದಯವಿಟ್ಟು ನನ್ನ ಕ್ಷಮಿಸಿಬಿಡು ಗೆಳತಿ, ಎಲ್ಲಿಗೆ ಹೋಗುತ್ತೀ? ಯಾವಾಗ ವಾಪಸ್ಸಾಗುತ್ತೀ? ಎಲ್ಲಿಗೆ ಹೋದರೂ ಪತ್ರ ಬರೆಯೋದನ್ನು ಮಾತ್ರ ಮರೆಯಲೇಬೇಡ ಎಂದೆಲ್ಲಾ ಹೇಳಿ ಪತ್ರ ಬರೆಯಬೇಡ ಪ್ಲೀಸ್. ನಾನೀಗ ಕೊನೇ ಕ್ಷಣದಲ್ಲಿದ್ದೀನಿ. ನನಗೆ ‘ಬ್ಲಡ್ ಕ್ಯಾನ್ಸರ್’!

ಇಂತಿ ನಿನ್ನ ಹುಡುಗ