ಹರ್ಯಾಣ ಸ್ಟೀಲರ್ಸ್ ವಿರುದ್ಧ ಬೆಂಗಳೂರು ಬುಲ್ಸ್ ಗೆ ಭರ್ಜರಿ ಜಯ

ಬೆಂಗಳೂರು: ಬೆಂಗಳೂರಿನ ಶೆರಾಟನ್ ಸ್ಟೇಡಿಯಂನಲ್ಲಿ ಗುರುವಾರ (ಡಿಸೆಂಬರ್ 30) ನಡೆದ ಪ್ರೊ ಕಬಡ್ಡಿ ಲೀಗ್ 8ನೇ ಆವೃತ್ತಿಯ 22ನೇ ಪಂದ್ಯದಲ್ಲಿ ಹರ್ಯಾಣ ಸ್ಟೀಲರ್ಸ್ ವಿರುದ್ಧ ಬೆಂಗಳೂರು ಬುಲ್ಸ್ 42-28ರ ಭರ್ಜರಿ ಜಯ ಗಳಿಸಿದೆ. ಇದು ಬುಲ್ಸ್ ಈ ಸೀಸನ್ ನಲ್ಲಿ ದಾಖಲಿಸಿದ ಸತತ ಮೂರನೇ ಗೆಲುವು.

ಬೆಂಗಳೂರು ಬುಲ್ಸ್ ನಾಯಕ ಪವನ್ ಕುಮಾರ್ ಶೆಹ್ರಾವತ್ ಅದ್ಭುತ ಆಟದ ಜೊತೆಗೆ ಜಿಬಿ ಮೋರೆ ಮತ್ತು ಮಹೇಂದರ್ ಸಿಂಗ್ ಸಾಥ್ ತಂಡದ ಗೆಲುವಿಗೆ ಕಾರಣವಾಯ್ತು. ಪವನ್ 15 ರೈಡ್, 2 ಟ್ಯಾಕಲ್, 5 ಬೋನಸ್ ಸೇರಿ ಒಟ್ಟು 22 ಪಾಯಿಂಟ್ಸ್ ನೀಡಿದರೆ, ಸಿಂಗ್ 4, ಮೋರೆ 5 ಅಂಕಗಳ ಕೊಡುಗೆಯಿತ್ತರು. ಇನ್ನು ಅಮನ್ 3, ಸೌರಭ್ ನಂದಲ್ 2, ಮಯೂರ್ ಕದಮ್ 1, ಚಂದ್ರನ್ ರಂಜಿತ್ 1 ಅಂಕ ಸೇರಿಸಿ ತಂಡದ ಟೋಟಲ್ ಹೆಚ್ಚಿಸಿದರು.

ಹರ್ಯಾಣ ಸ್ಟೀಲರ್ ಕೂಡ ತಕ್ಕ ಮಟ್ಟಿನ ಪೈಪೋಟಿ ನೀಡಿತು. ವಿಕಾಸ್ ಖಂಡೋಲ 7, ರೋಹಿತ್ ಗುಲಿಯಾ 5, ಜೈದೀಪ್ ಕುಲದೀಪ್ 4, ಆಶಿಷ್ 4, ಮೀತು ಮಹೇಂದರ್ 3, ರವಿ ಕುಮಾರ್ 2, ಸುರೇಂದರ್ ನಡ 2, ಮೋಹಿತ್ 1 ಅಂಕ ಸೇರಿಸಿ ಸೋಲಿನ ಅಂತರ ಕಡಿಮೆ ಮಾಡಲು ನೆರವಾದರು. 

ಈ ಪಂದ್ಯದ ಬಳಿಕ ಬೆಂಗಳೂರು ಬುಲ್ಸ್ ಪಿಕೆಎಲ್ ಅಂಕಪಟ್ಟಿಯಲ್ಲಿ ದ್ವಿತೀಯ ಸ್ಥಾನಕ್ಕೇರಿದೆ. ಆಡಿರುವ 4 ಪಂದ್ಯಗಳಲ್ಲಿ ಬುಲ್ಸ್ 3 ಗೆಲುವುಗಳೊಂದಿಗೆ 15 ಅಂಕ ಕಲೆ ಹಾಕಿದೆ. ಅಂಕಪಟ್ಟಿಯಲ್ಲಿ ಅಗ್ರ ಸ್ಥಾನದಲ್ಲಿರುವ ದಬಾಂಗ್ ಡೆಲ್ಲಿ ಆಡಿರುವ 4 ಪಂದ್ಯಗಳಲ್ಲಿ 3 ಗೆಲುವು, 1 ಡ್ರಾ ಸೇರಿ 18 ಪಾಯಿಂಟ್ಸ್ ಗಳಿಸಿದೆ. ಇನ್ನು ಮೂರನೇ ಸ್ಥಾನದಲ್ಲಿ ಯು ಮುಂಬಾ (14 ಪಾಯಿಂಟ್ಸ್), 4ನೇ ಸ್ಥಾನದಲ್ಲಿ ಗುಜರಾತ್ ಜೈಂಟ್ಸ್ (12 ಪಾಯಿಂಟ್ಸ್) ಇದೆ.