ಉಗಿ ಇಂಜಿನ್ ಉರುಳೋಕೆ ಶುರುವಿಟ್ಟ ಕುತೂಹಲಕಾರಿ ಕತೆ!

ರೈಲಿಗೆ ಉಗಿಯಂತ್ರ ಅಂತ ಕರೀತಾರೆ ಅನ್ನೋ ಸಂಗತಿ ನಿಮಗೆ ಗೊತ್ತೇಯಿದೆ. ರೈಲು ಚಲಿಸೋದೇ ಹಬೆ ಶಕ್ತಿಯಿಂದ. ಈಗ ಕೆಲವೆಡೆ ಎಲೆಕ್ಟ್ರಿಕ್ ಸಹಾಯದಿಂದಲೂ ರೈಲುಗಳು ಸಾಗೋದಿದೆ. ಆದರೆ ಆರಂಭದ ದಿನಗಳಲ್ಲಿ ರೈಲು ಚಲಿಸುತ್ತಿದ್ದು ಹಬೆಯ ಸಹಾಯದಿಂದಲೇ. 

ಈಗ ಸುಮ್ಮನಾದರೂ ಊಹಿಸಿಕೊಳ್ಳಿ; ಅಷ್ಟಗಲದ, ಮಾರುದ್ದದ ರೈಲು ಗಾಡಿಯನ್ನು ಬರೀ ಉಗಿಶಕ್ತಿ ಮುನ್ನಡೆಸುತ್ತದೆ ಅಂದರೆ ಅಚ್ಚರಿ ಅನ್ನಿಸೋದಿಲ್ವೆ? ವೈಜ್ಞಾನಿಕ ಜಗತ್ತೇ ಹಾಗೆ. ಕುತೂಹಲದ ಬೆನ್ನು ಬಿದ್ದರೆ ವೈಜ್ಞಾನಿಕ ಜಗತ್ತಿನ ಅಚ್ಚರಿಯ ಅನೇಕ ಸಂಗತಿಗಳು ಅನಾವರಣಗೊಳ್ಳುತ್ತವೆ.

ಅಂದಹಾಗೆ ನೀರಿನಲ್ಲೂ ಶಕ್ತಿಯಿದೆ. ನೀರನ್ನು ಬಿಸಿ ಮಾಡಿದಾಗ, ನೀರು ಕುದಿಬಿಂದು ತಲುಪಿದಾಗ ಅದರಲ್ಲಿರುವ ಶಕ್ತಿ ಜಾಗೃತಗೊಂಡು ಹೊರಹೊಮ್ಮುತ್ತದೆ. ರೈಲು ಗಾಡಿಯನ್ನು ಮುನ್ನಡೆಸೋದು ಈ ಶಕ್ತಿಯೇ. ಹಾಗಾದರೆ ಚುಕುಬುಕು ರೈಲು ಉರುಳೋಕೆ ಶುರುವಿಟ್ಟ ಕಾಲದೆಡೆಗೊಂದು ಸಣ್ಣ ಪಯಣ ಹೋಗಿ ಬರೋಣವೇ?

ಕ್ರಿ.ಶ. 1ನೇ ಶತಮಾನದಲ್ಲಿ ಈಜಿಪ್ಟ್ ದೇಶದ ಅಲೆಕ್ಸಾಂಡ್ರಿಯಾ ನಗರದಲ್ಲಿದ್ದ ಹೀರೋ ಎಂಬಾತ ಉಗಿ ಇಂಜಿನ್ ನ ಪ್ರಥಮ ನಿರ್ಮಾಪಕ ಎಂದು ಇತಿಹಾಸ ಹೇಳುತ್ತದೆ. ಉಗಿ ಇಂಜಿನ್ ತಂತ್ರಜ್ಞಾನ ಹೊಳೆದದ್ದು ಒಂದು ಕೌತುಕವೇ ಸರಿ. ನೀರು ಕುದಿಯುತ್ತಿದ್ದ ಪಾತ್ರೆಯೊಂದರ ಮುಚ್ಚಳ ಹಾರಿ ಹೋಗುವ ಹಾಗೆ ಅಲುಗಾಡುತ್ತಿದ್ದುದನ್ನು ನೋಡುತ್ತಿದ್ದಂತೆ ಬಿಸಿ ಆವಿಗೂ ಶಕ್ತಿಯಿದೆ ಅನ್ನೋ ಸಂಗತಿ ಹೀರೋಗೆ ಹೊಳೆಯಿತು. ಮುಂದೆ ಉಗಿ ಶಕ್ತಿಯನ್ನು ಉಪಯೋಗಿಸುವ ಬಗ್ಗೆ ಪ್ರಯತ್ನಗಳು ನಡೆದವು.

ನಮ್ಮ ಹೀರೋ ನಿರ್ಮಿಸಿದ ಸಾಧನ ಉಗಿ ಟರ್ಬೈನ್ ಮಾದರಿಯಲ್ಲಿತ್ತು. ವೃತ್ತಾಕಾರದ ಒಂದು ನೀರಿನ ಪಾತ್ರೆಯ ಎರಡೂ ಪಕ್ಕಗಳಲ್ಲಿ ಎರಡು ಕೊಳವೆಗಳನ್ನು ಎಲ್ ಆಕಾರದಲ್ಲಿ ಜೋಡಿಸಲಾಗಿತ್ತು. ಆ ಪಾತ್ರೆಯ ನೀರನ್ನು ಕಾಯಿಸಿದಾಗ ಅದರಿಂದ ಹೊರಹೊಮ್ಮುವ ಉಗಿ ಎರಡೂ ಕೊಳವೆಗಳ ಮೂಲಕ ಪರಸ್ಪರ ವಿರುದ್ಧ ದಿಕ್ಕಿನಲ್ಲಿ ಹೊರ ಹೋಗುತ್ತಿತ್ತು. ಉಗಿ ಹೊರಹೊಮ್ಮುವ ಕ್ರಿಯೆಯಿಂದಾಗಿ ಉಂಟಾದ ಪ್ರತಿಶಕ್ತಿಯು ಆ ಪಾತ್ರೆಯು ತನ್ನ ಅಕ್ಷದಲ್ಲಿ ಸುತ್ತುವಂತೆ ಮಾಡುತ್ತಿತ್ತು.  

ಅನಂತರ ಉಗಿ ಶಕ್ತಿಯ ಈ ತಂತ್ರಜ್ಞಾನವನ್ನು ಇನ್ನಷ್ಟು ಅಭಿವೃದ್ಧಿಪಡಿಸಲಾಯ್ತು. ಕಾಲ ಕಳೆದ ಹಾಗೆ ಮೆಲ್ಲಗೆ ಉಗಿ ಇಂಜಿನ್ ರೂಪು ತಳೆದೇಬಿಟ್ಟಿತು. ಅಂದ್ಹಾಗೆ, ಉಗಿ ಇಂಜಿನ್ ಅನ್ನು ಅಭಿವೃದ್ಧಿಪಡಿಸಿದ ಹೆಗ್ಗಳಿಕೆ ಸ್ಕಾಟಿಶ್ ಮೆಕಾನಿಕಲ್ ಇಂಜಿನಿಯರ್ ಜೇಮ್ಸ್ ವ್ಯಾಟ್ ಮತ್ತು ಇಂಗ್ಲಿಷ್ ಇನ್ವೆಂಟರ್ ಥಾಮಸ್ ನ್ಯೂಕಾಮನ್ ಅವರಿಗೆ ಸಲ್ಲುತ್ತದೆ.