ಈ ಹಕ್ಕಿ ನಿಮ್ಮ ಬಳಿ ಬಂದರೆ ತಲೆ ತಿರುಗಿ ಬಿದ್ದುಬಿಡುತ್ತೀರಿ!

ಅಮೆಜಾನ್ ಜೌಗು ಅರಣ್ಯ ಪ್ರದೇಶ, ಮ್ಯಾಂಗ್ರೋವ್ ಅರಣ್ಯಗಳಲ್ಲಿ ವಾಸಿಸುವ ದಕ್ಷಿಣ ಅಮೆರಿಕಾದ ಗಯಾನಾ ರಾಷ್ಟ್ರಪಕ್ಷಿಯಾಗಿರುವ ಹೋಟ್ಜಿನ್ ನಿಮ್ಮ ಬಳಿಯೇನಾದರೂ ಬಂದುಬಿಟ್ಟರೆ, ಅದರ ಮೈಯಿಂದ ಹೊಮ್ಮುವ ವಾಸನೆ ತಾಳಲಾರದೆ ತಲೆ ಗಿರಗಿಟ್ಲೆ ಹೊಡೆದು ನೀವು ಕೆಳಗೆ ಕುಸಿದು ಬಿಡಬಹುದು. ಇಲ್ಲವೇ, ಉಸಿರಾಡೋದೇ ಕಿರಿಕಿರಿ ಅನ್ನಿಸಿ ಕೊನೆಗೆ ಪೂರ್ತಿ ಹೊಟ್ಟೆಯನ್ನೇ ತೊಳೆಸಿಕೊಳ್ಳಲೂಬಹುದು!

ನೋಡೋಕೆ ರೆಕ್ಕೆ ಪುಕ್ಕಗಳಿಂದ ಆಕರ್ಷಕವಾಗಿರುವ ಈ ಹೋಟ್ಜಿನ್ ಶುದ್ದ ಪರ್ಣಾಹಾರಿ ಹಕ್ಕಿ. ಬರೀ ಎಲೆಯನ್ನೇ ತಿಂದು ಜೀವಿಸುವ ಹಕ್ಕಿಯಿದು. ಇದು ಅಗಿದು ನುಂಗಿದ ಎಲೆಯ ಚೂರುಗಳು ನೇರವಾಗಿ ಜಠರವನ್ನು ಸೇರುವ ಬದಲು ಜೀರ್ಣಾಂಗವ್ಯೂಹದ ಒಂದು ವಿಶಿಷ್ಟ ಕೋಶವನ್ನು ಸೇರುತ್ತವೆ. ಅಲ್ಲಿರುವ ವಿಶೇಷ ಜೀರ್ಣಕಾರಿ ಬ್ಯಾಕ್ಟಿರಿಯಾಗಳು ಎಲೆಯ ಚೂರುಗಳು ಕೊಳೆಯುವಂತೆ ಮಾಡುತ್ತವೆ. ಅನಂತರ ಆ ಆಹಾರ ಜಠರಕ್ಕೆ ಸಾಗಿಸಲ್ಪಟ್ಟು ಅಲ್ಲಿ ಜೀರ್ಣವಾಗುತ್ತದೆ.

ಹೀಗೆ ಆಹಾರ ಬ್ಯಾಕ್ಟಿರಿಯಾಗಳಿಂದ ಕೊಳೆಯುವಾಗ ಹಕ್ಕಿಯ ದೇಹದಿಂದ ಬರುವ ಕೊಳೆತ ಹಸಿಸೆಗಣಿ ಗೊಬ್ಬರದ ಅಸಹ್ಯ ವಾಸನೆಯಿಂದಾಗಿ ನಾವು ಹತ್ತಿರ ನಿಲ್ಲಲಾಗೋಲ್ಲ. ಇದಕ್ಕೆಂದೇ ಈ ಹಕ್ಕಿಗೆ ಗಬ್ಬು ಹಕ್ಕಿ ಎನ್ನುವ ಹೆಸರೂ ಇದೆ. ಕೆಲ ಪ್ರಾಣಿ ಪ್ರಪಂಚವೇ ವೈಶಿಷ್ಟ್ಯತೆಯಿಂದ ಕೂಡಿರುತ್ತವೆ. ಅಂಥವುಗಳ ಬಗ್ಗೆ ಕೇಳುವಾಗೆಲ್ಲ ಕೌತುಕ ನಮ್ಮ ಬಳಿ ಸುಳಿದಾಡುತ್ತದೆ. ಅಂಥ ಭಿನ್ನ ರೀತಿಯ ಸಾಲಿನಲ್ಲಿ ಬರುವ ಚಂದದ ಹಕ್ಕಿ ಹೋಟ್ಜಿನ್.

ಹೋಟ್ಜಿನ್‌ಗೆ ರೆಪ್ಟೈಲ್ ಬರ್ಡ್, ಸ್ಕಂಕ್ ಬರ್ಡ್, ಸ್ಟಿಂಕ್‌ಬರ್ಡ್, ಅಥವಾ ಕ್ಯಾಂಜೆ ಫೆಸೆಂಟ್ ಎಂಬಿತ್ಯಾದಿ ಹೆಸರುಗಳೂ ಇವೆ. ಒಪಿಸ್ಟೊಕೊಮಸ್ ಹೊಜಿನ್ ಇದರ ವೈಜ್ಞಾನಿಕ ಹೆಸರು. ಅಮೆಜಾನ್‌ನ ಮ್ಯಾಂಗ್ರೋವೇವ್ ಕಾಡುಗಳಲ್ಲದೆ ದಕ್ಷಿಣ ಆಫ್ರಿಕಾದ ಒರಿನೊಕೊ ಬೇಸಿನ್ ಪ್ರದೇಶದಲ್ಲೂ ಹೆಚ್ಚಾಗಿ ಕಾಣಸಿಗುತ್ತದೆ.