ಭೀಮಾಕಾರದ ಈ ಬಾಳೆ ಗಿಡದಲ್ಲಿ ಒಂದೊಂದು ಹಣ್ಣಿನ ತೂಕ 3 ಕೆಜಿ!

ಪ್ರಕೃತಿಯೊಳಗೆ ಎಷ್ಟೋ ವಿಸ್ಮಯಕಾರಿ ಸಂಗತಿಗಳಿರುತ್ತವೆ. ನಿಸರ್ಗದ ಕೌತಕಗಳ ಸಂಗತಿಗಳು ಕೇಳಿದಾಗ ನಮ್ಮನ್ನು ನಿಬ್ಬೆರಗಾಗಿಸೋದಿದೆ. ನಿಸರ್ಗದ ಅಂಥ ಅದೆಷ್ಟೋ ಸಂಗತಿಗಳು ದೇಶದ ಮೂಲೆ ಮೂಲೆಗಳಲ್ಲಿವೆ. ಅವುಗಳಲ್ಲೊಂದು ಭೀಮಗಾತ್ರದ ಬಾಳೆ ಗಿಡಗಳು.

ನಮ್ಮೂರಿನಲ್ಲಿ ಬೆಳೆಯೋ ಬಾಳೆ ಗಿಡಗಳು ಬೃಹತ್ ಗಾತ್ರದ ನೂರಿನ್ನೂರು ಹಣ್ಣುಗಳನ್ನು ಕೊಟ್ಟ ದಾಖಲೆಗಳು ಬಹಳಷ್ಟು ಇವೆ. ಆದರೆ ಒಂದು ಬಾಳೆ ಗಿಡದ ಒಂದೇ ಹಣ್ಣು 2 ರಿಂದ 3 ಕೆಜಿ ತೂಗುತ್ತದೆ ಎಂದರೆ ಆ ಬಾಳೆ ಗಿಡ ಎಷ್ಟು ದೊಡ್ಡದಿರಬಹುದು ಊಹಿಸಿ. ಆದರೆ ಇಂಥ ಬಾಳೆ ಗಿಡಗಳು ಭೂಮಿಯಲ್ಲಿ ಈಗಲೂ ಇವೆ.

ಪಪುವಾ ನ್ಯೂ ಗಿನಿಯಾದಲ್ಲಿ ಬೃಹತ್ ಗಾತ್ರದ ಬಾಳೆ ಗಿಡಗಳು ಗಿನ್ನಿಸ್ ವರ್ಲ್ಡ್ ರೆಕಾರ್ಡ್ ಸೃಷ್ಟಿಸಿವೆ. ಇಲ್ಲಿನ ಬಾಳೆ ಗಿಡಗಳು ಭೀಮಾಕಾರದಲ್ಲಿರುತ್ತವೆ ಮತ್ತು ನಾವೆಲ್ಲಾ ಬೆರಗಾಗುವಷ್ಟು ಎತ್ತೆತ್ತರಕ್ಕೆ ಬೆಳೆಯುತ್ತವೆ. ‘ಮೂಸಾ ಇಂಜೆನ್ಸ್’ ಎಂದು ಕರೆಯಲಾಗುವ ಈ ಭೀಮಾಕಾರದ ಬಾಳೆ ಗಿಡಗಳು ಸಾಮಾನ್ಯವಾಗಿ ಸುಮಾರು 15 ಮೀಟರ್ (49 ಫೀಟ್) ಎತ್ತರಕ್ಕೆ ಬೆಳೆಯುತ್ತವೆ. ಇದರ ಎಲೆಗಳು ನೆಲದಿಂದ ಸುಮಾರು 20 ಮೀಟರ್ (66 ಫೀಟ್) ಎತ್ತರದಲ್ಲಿರುತ್ತವೆ.

ಈ ಬಾಳೆ ಗಿಡದಲ್ಲಿ ಒಂದೊಂದು ಹಣ್ಣು ಸುಮಾರು 18 ಸೆಂಟಿ ಮೀಟರ್ (7 ಇಂಚುಗಳು) ಉದ್ದಕ್ಕಿರುತ್ತವೆ. ಒಂದೇ ಹಣ್ಣು 1.5-3 ಕೆಜಿ ತೂಕವಿರುವುದೂ ಇದೆ. ಒಂದೇ ಗಿಡದಲ್ಲಿ ಇಂಥ ಬೃಹತ್ ಗಾತ್ರದ ಸುಮಾರು 300 ಬಾಳೆ ಹಣ್ಣುಗಳು ಬೆಳೆಯುತ್ತವೆ. ಎಲ್ಲಾ ಸಮಯದಲ್ಲೂ ಇಷ್ಟೇ ದೊಡ್ಡ ಹಣ್ಣುಗಳು ಮತ್ತು ಇಷ್ಟು ಸಂಖ್ಯೆಯ ಹಣ್ಣುಗಳು ಇರುತ್ತವೆ ಎಂದೇನೂ ಅಲ್ಲ. ಆದರೆ ಸಾಮಾನ್ಯ ಬಾಳೆ ಹಣ್ಣುಗಳ ಗಾತ್ರಕ್ಕೆ ಈ ಬಾಳೆಹಣ್ಣುಗಳನ್ನು ಹೋಲಿಸಿದರೆ, ಸಾಮಾನ್ಯ ಬಾಳೆ ಹಣ್ಣುಗಳ ಸಂಖ್ಯೆಗಳಿಗೆ ಹೋಲಿಸಿದರೆ ಇವು ಸಾಕಷ್ಟು ದೊಡ್ಡದಾಗಿ ಮತ್ತು ಹೆಚ್ಚಿನ ಸಂಖ್ಯೆಯಲ್ಲಿರುತ್ತವೆ.

ಕೆಲವೊಂದು ವರದಿಗಳ ಪ್ರಕಾರ, ಪಪುವಾ ನ್ಯೂ ಗಿನಿಯಾದಲ್ಲಿ ಬೆಳೆಯುವ ಈ ಭೀಮ ಗಾತ್ರದ ಬಾಳೆ ಗಿಡಗಳು 30 ಮೀಟರ್ ಎತ್ತರಕ್ಕೆ ಬೆಳೆಯುತ್ತವೆ ಎನ್ನಲಾಗುತ್ತದೆ. ಆದರೆ ಈ ಹೇಳಿಕೆಗಳನ್ನು ವೈಜ್ಞಾನಿಕವಾಗಿ ಒಪ್ಪಲು ಸಾಧ್ಯವಿಲ್ಲ ಎನ್ನುವವರೂ ಇದ್ದಾರೆ. ಹಾಗಂತ, ಭೀಮ ಗಾತ್ರದ ಬಾಳೆ ಗಿಡಗಳು ಇರುವುದಂತೂ ಸುಳ್ಳಲ್ಲ. ಈ ಬಾಳೆ ಗಿಡಗಳ ಬುಡದಲ್ಲಿ ನಿಂತರೆ ನಾವು ಪುಟಾಣಿ ಪಿಳ್ಳೆಯಾಗಿ ಕಾಣುತ್ತೇವೆ ಅನ್ನೋದೂ ಅಷ್ಟೇ ಸತ್ಯ. ಒಟ್ಟಿನಲ್ಲಿ ಈ ಜಗ ಸೋಜಿಗವಲ್ಲವೆ?

-ಸದಾ ಸಕಲೇಶಪುರ.