ಬಣ್ಣಬಣ್ಣದ ಕನಸುಗಳೊಂದಿಗೆ ಕಲರ್‌ಫುಲ್ಲಾಗಿ ಬದುಕೋಣ..

ಉದಾಸೀನದ ಪರಮಾವಧಿಯೆಂದರೆ ನಿದ್ದೆಯಲ್ಲಿ ಕನಸು ಕಾಣೋದು; ಆ ಕನಸಿನೊಳಗೂ ನಿದ್ದೆ ಮಾಡೋದು! ಅಂತ ಕನಸಿನ ಬಗ್ಗೆ ಇನ್‌ಬಾಕ್ಸಿಗೆ ಬಂದು ಬಿದ್ದ ಇಂಗ್ಲೀಷು ಮೆಸೇಜೊಂದನ್ನು ನೋಡಿ ನಿಜಕ್ಕೂ ಇದು ಗಮ್ಮತ್ತಿನ ಮೆಸೇಜಪ್ಪಾ ಅನ್ನಿಸ್ತು. ನಿದ್ದೆಯೊಳಗೊಂದು ಕನಸು ಕಂಡು, ಆ ಕನಸಿನೊಳಗೂ ನಿದ್ದೆ ಮಾಡೋನು ನಿದ್ದೇಲೆ ಬಾಕಿಯಾಗುತ್ತಾನೆ; ಎಕ್ಸಲೇಟರ್ ಒತ್ತಿದ ಹಾಗೆ ಭಾರೀ ಸ್ಪೀಡಿನಲ್ಲಿರುವ ಕಾಲ ಅವನನ್ನು ಬಿಟ್ಟು ಬಲುದೂರ ಸಾಗಿಬಿಡುತ್ತೆ. ಆಮೇಲೆ ಆತ ಚಿರನಿದ್ರೆಗೆ ಜಾರೋದೇ ಲೇಸು. ಯಾಕೇಂದ್ರೆ ಉದಾಸೀನವನ್ನಪ್ಪಿಕೊಂಡು ಸಮಯವನ್ನು ಹಾಸಿಗೇಲಿ ಕಳೆಯೋನು ಯಾವುದಕ್ಕೂ ಬಾರದಷ್ಟು ವೇಸ್ಟ್‌ಬಾಡಿ ಆಗಿಹೋಗುತ್ತಾನೆ, ಕಾಲವೇ ಅವನನ್ನ ವೇಸ್ಟ್‌ಬಾಡಿಗಳ ಸಾಲಿನಲ್ಲಿ ನಿಲ್ಲಿಸಿ ವ್ಯಂಗ್ಯವಾಡುತ್ತೆ! 

ಚಿಂದಿ ಆಯುವುದರಲ್ಲಿ ಮಗ್ನನಾಗಿದ್ದ ಪುಟ್ಟಬಾಲಕನೊಬ್ಬ ಒಂದು ಕ್ಷಣ ಸದ್ದು ಮಾಡುತ್ತ ತೇಲಿ ಹೋಗ್ತಿದ್ದ ವಿಮಾನದತ್ತ ದಿಟ್ಟಿಸಿ ನುಡಿಯುತ್ತಾನೆ, 'ನಾನೂ ಒಂದಿನ ಇದ್ರಲ್ಲಿ ಹಾರ್ಬೇಕು!. ಎಂಥಾ ಚಂದದ ಕನಸಲ್ವಾ ಇದು?! ಸಾಧನೆಯೆಡೆಗೆ ಹೆಜ್ಜೆ ಕಿತ್ತಿಡಬೇಕಾದರೆ ಇಂಥದ್ದೇ ಒಂದು ಕನಸು ನಮ್ಮ ಕಣ್ಣುತುಂಬಿರಬೇಕು. ಬರೀ ಕನಸ್ಸಿದ್ದರೆ ಸಾಲದು, ಉದಾಸೀನದ ಮನಸ್ಸಿಗೆ ಲಗಾಮು ಹಾಕಿ ಕನಸ್ಸಿನ ಬೆನ್ನು ಹಿಡಿದು ಹೊರಡಬೇಕು ನಾವು; ಕಂಡ ಕನಸ್ಸನ್ನು ನನಸಾಗಿಸುವಲ್ಲಿ ಶತಶ್ರಮ ಪಡಬೇಕು!

ಕನಸುಗಳಿರಬೇಕು ಕಣ್ಣತುಂಬ; ಆದರೆ ನಿದ್ದೆಯೊಳಗೊಂದು ನಿದ್ದೆ ಮಾಡುವ ಉದಾಸೀನದ ಹಾಳು ಕನಸು ಬೇಡ ನಮಗೆ. ಯಾಕೆಂದರೆ ಸಾಧನೆಗೆ ಶಾರ್ಟ್‌ಕಪ್‌ಗಳಿಲ್ಲ, ಎತ್ತರದಲ್ಲಿ ನಿಲ್ಲೋಕೆ ಅತೀಸುಲಭದ, ಅತ್ಯುತ್ತಮ ದಾರಿಯೊಂದೆ; ಹಾರ್ಡ್‌ವರ್ಕ್! ಸೊ, ಸಾಧಿಸಿ ಬೀಗಿನಕ್ಕಂತೆ, ನಮ್ಮನ್ನು ಹೀಯಾಳಿಸಿದವರ ಮುಂದೆ ಚಂದದ ಬದುಕು ಬದುಕಿದಂತೆ ಹೊನ್ನ ಕನಸೊಂದನ್ನು ಕಾಣೋಣ. ಆ ಕನಸ್ಸನ್ನು ನನಸಾಗಿಸಲು ಸೆಣಸಾಡೋಣ. ಏನಂತೀರಿ?

-ಸದಾ ಸಕಲೇಶಪುರ.