ಏಡಿಗಳಿಗಾಗಿಯೇ ಇಲ್ಲಿ ಸ್ಪೆಶಲ್ ಬ್ರಿಡ್ಜ್‌ಗಳಿವೆ, ಅಂಡರ್ ಪಾಸ್‌ಗಳಿವೆ!

ನಮ್ಮಲ್ಲಿ, ಅಂದರೆ ಭಾರತದಲ್ಲಿ ಕಾಡುಗಳ ಮಧ್ಯೆ ರೋಡು ಮಾಡಿ, ರೈಲು ಕಂಬಿಗಳನ್ನು ನಿರ್ಮಿಸಿ ಸಾವಿರಾರು ಪ್ರಾಣಿಗಳ ಮಾರಣಹೋಮಕ್ಕೆ ಕಾರಣವಾಗುತ್ತಿರುವುದು ಇಂದು ನೆನ್ನೆಯ ಕತೆಯಲ್ಲ. ಕಾಡು ಪ್ರಾಣಿಗಳ ಮೀಸಲು ಪ್ರದೇಶದಲ್ಲಿ ವಾಹನಗಳ ಓಡಾಟಕ್ಕಿದ್ದ ನಿರ್ಬಂಧನ್ನು ತೆರವುಗೊಳಿಸಿ ವನ್ಯ ಮೃಗಗಳ ಸಾವು, ಆ ಮೂಕ ರೋದಕ ಕಂಡೂ ಅದಕ್ಕೆ ಮನ ಕರಗಿಕೊಳ್ಳದ ಗತಿಗೆಟ್ಟ ಆಡಳಿತ ವ್ಯವಸ್ಥೆ ನಮ್ಮದು.

ಪಶ್ಚಿಮ ಬಂಗಾಳದಲ್ಲಿ ಜಲ್’ಪೈಗುರಿಯಲ್ಲಿ ಧುಬ್ರಿ ಎಕ್ಸ್‌ಪ್ರೆಸ್ ಟ್ರೇನು ಗುದ್ದಿ, ಮೈಯಿಡೀ ಚರ್ಚ ಕಿತ್ತು ರೋದನೆ ಅನುಭವಿಸಿದ್ದ ಆನೆ ಅಸುನೀಗಿದ್ದ ಘಟನೆ ಕಳೆದ ಸೆಪ್ಟೆಂಬರ್ ಕೊನೇ ವಾರದಲ್ಲಿ ನಡೆದಿತ್ತು. ಅಲ್ಲಿ ಕಾಡ ನಡುವೆ ರೈಲು ಮಾರ್ಗ ನಿರ್ಮಿಸಿದ್ದಷ್ಟೇ ಅಲ್ಲ, ಕೇಂದ್ರ ರೈಲ್ವೇ ಇಲಾಖೆ ಆ ಕಾಡ ದಾರಿಯಲ್ಲಿ ರೈಲು ಚಲಿಸಲಿದ್ದ ವೇಗದ ಮಿತಿಯನ್ನು (ಗಂಟೆಗೆ 30 ಕಿ.ಮೀ) ತೆಗೆಸಿ ಗಂಟೆಗೆ 60 ಕಿ.ಮೀ. ವೇಗದಲ್ಲಿ ರೈಲು ಚಲಿಸಲು ಆಜ್ಞೆ ಹೊರಡಿಸಿತ್ತು. ಇಂಥ ಅನಿಷ್ಟ ಆಡಳಿತ ನೀತಿಯಿಂದಲೇ ಭಾರತದಲ್ಲಿ ಕಾಡು ಪ್ರಾಣಿಗಳ ಮೂಕ ರೋದನೆಗೆ ಕೊನೆಯಿಲ್ಲವಾಗಿದೆ.

ಅದೇ ಆಸ್ಟ್ರೇಲಿಯಾದ ಕ್ರಿಸ್ಮಸ್ ಐಲೆಂಡ್‌ ಎಂಬ ಜಾಗವಿದೆ. ಇಲ್ಲಿ ಮಿಲಿಯಗಟ್ಟಲೆ ಕೆಂಪು ಏಡಿಗಳು ಸಮುದ್ರದಲ್ಲಿ ಮೊಟ್ಟೆ ಇಡಲು ಪ್ರತಿ ವರ್ಷ ಜನವರಿ ಆರರ ಸುಮಾರಿಗೆ ವಲಸೆ ಹೋಗುತ್ತವೆ. 116 ಮಿಲಿ ಮೀಟರ್ ಅಗಲವಿರುವ (4.6 ಇಂಚು) ಈ ಕೆಂಪು ಏಡಿಗಳು ವಲಸೆಗೆ ಸಹಾಯಕವಾಗಿ ಐದು ಮೀಟರ್ ಎತ್ತರದ ಸೇತುವೆ ಒಂದನ್ನು ಹಾಗು 31 ಕಡೆ ಅಂಡರ್ ಪಾಸ್‌ಗಳನ್ನು ನಿರ್ಮಿಸಲಾಗಿದೆ.

ಕೆಂಪು ಏಡಿಗಳು ಚೆಲ್ಲಾಪಿಲಿಯಾಗಿ ಎಲ್ಲಾ ದಿಕ್ಕುಗಳಲ್ಲಿ ಹರಿದಾಡುವುದು ಸಹಜ. ಅವುಗಳು ನಿರ್ದಿಷ್ಟ ಮಾರ್ಗದಲ್ಲಿ ಮಾತ್ರ ಹಾದು ಹೋಗುವಂತೆ ಮಾಡಲು ಸುಮಾರು 20 ಕಿಲೋ ಮೀಟರ್ನಷ್ಟು ಪ್ಲಾಸ್ಟಿಕ್ ತಡೆಗೋಡೆಗಳನ್ನು ಅಂಡರ್ ಪಾಸ್ ಮತ್ತು ಓವರ್ ಬ್ರಿಡ್ಜ್‌ಗಳ ಇಕ್ಕೆಲಗಳಲ್ಲಿ ಹಾಕಿ ಅನುವು ಮಾಡಿಕೊಡಲಾಗಿದೆ.

ಈ ಕ್ರಿಸ್ಮಸ್ ಐಲೆಂಡ್‌ನಲ್ಲಿ ಹಲವು ವರ್ಷಗಳ ಅಂದಾಜು 44 ಮಿಲಿಯನ್ ವಯಸ್ಕ ಕೆಂಪು ಏಡಿಗಳು ಜೀವಿಸಿದ್ದ ಬಗ್ಗೆ ದಾಖಲೆಗಳಿವೆ. ವನ್ಯ ಜೀವಿಗಳ, ಜಲಚರಗಳ, ಕಾಡುಗಳ ಅಳಿವಿಗೆ ಮಾನವನ ಕಾಣಿಕೆ ಬಹಳ ದೊಡ್ಡದಲ್ಲವೆ? ಹಾಗಾಗಿ ಇಲ್ಲೊಂದು ಕಡೆ ಜೀವಿಗಳ ಉಳಿವಿಗೆ ಹೊಸ ಐಡಿಯಾ ಮಾಡಲಾಗಿದೆ. ಒಳ್ಳೇದೇ ನೋಡಿ.