ಸತ್ತಾಗ ದೇಹದಿಂದ ದುರ್ನಾತ ಬರೋದ್ಯಾಕೆ?!

ಅದು ಮನುಷ್ಯನಾಗಿರಲಿ ಅಥವಾ ಪ್ರಾಣಿಗಳಾಗಿರಲಿ; ದೇಹ ನಿರ್ಜೀವ ಸ್ಥಿತಿಗೆ ಹೋದ್ಮೇಲೆ ಆ ದೇಹದಿಂದ ಸಹಿಸಲಾಗದ ವಾಸನೆ ಬರುತ್ತೆ. ಯಾವುದೇ ಜೀವಿ ಬದುಕಿದ್ದಷ್ಟು ಕಾಲ ಬಾರದ ದುರ್ಗಂಧ, ಸತ್ತಾಗ ಯಾಕೆ ದೇಹದಿಂದ ಹೊರಹೊಮ್ಮುತ್ತೆ ಅಂತ ಯೋಚಿಸಿದ್ರೆ ಕುತೂಹಲ ಹುಟ್ಟುತ್ತೆ ಅಲ್ವಾ? ನಿರ್ಜೀವ ದೇಹದಿಂದ ದುರ್ನಾತ ಬರೋದ್ಯಾಕೆ ಅನ್ನೋ ಪ್ರಶ್ನೆಗೆ ಸೈನ್ಸ್ ಲೋಕದಲ್ಲಿ ಉತ್ತರವಿದೆ.

ಮನುಷ್ಯರೂ ಸೇರಿದಂತೆ ಭೂಮಿಯ ಸಕಲ ಜೀವಿಗಳ ದೇಹದಲ್ಲಿ ಅನೇಕ ಬಗೆಯ ರಾಸಾಯನಿಕಗಳಿರುತ್ತವೆ. ಬಗೆ ಬಗೆಯ ಬ್ಯಾಕ್ಟಿರಿಯಾಗಳೂ ಇರುತ್ತವೆ. ಪರಾವಲಂಬಿ ಜೀವಿಗಳಾದ ಬ್ಯಾಕ್ಟಿರಿಯಾಗಳು ಮೃತ ದೇಹದ ಮೇಲೆ ದಾಳಿ ಮಾಡುವಾಗ ಅವು ಆ ದೇಹದಲ್ಲಿರುವ ವಿವಿಧ ರಾಸಾಯನಿಕಗಳನ್ನು ತಮ್ಮ ಅನುಕೂಲಕ್ಕೆ ತಕ್ಕಂತೆ ಬಳಸಿಕೊಳ್ಳುತ್ತವೆ. ಹೀಗೆ ಬ್ಯಾಕ್ಟಿರಿಯಾಗಳು ವಿವಿಧ ರಾಸಾಯನಿಕಗಳನ್ನು ಮಾರ್ಪಾಡು ಮಾಡಿಕೊಳ್ಳುವಾಗ ದುರ್ಗಂಧ ಹೊಮ್ಮಿಸುವ ಗಂಧಕ, ಪಾಸ್ಪರಸ್ ಮತ್ತು ನೈಟ್ರೋಜನ್ ನಂಥ ಪದಾರ್ಥಗಳು ಬಿಡುಗಡೆಯಾಗುತ್ತವೆ. ಇವೇ ನಿರ್ಜೀವ ದೇಹದಲ್ಲಿ ದುರ್ಗಂಧ ಹೊಮ್ಮಲು ಕಾರಣವಾಗುತ್ತವೆ.

ಪ್ರಾಣ ಇರುವವರೆಗೂ ಬ್ಯಾಕ್ಟಿರಿಯಾಗಳ ದಾಳಿಯನ್ನು ತಡೆಗಟ್ಟಲು ನಮ್ಮ ದೇಹದಲ್ಲಿ ರಕ್ಷಣಾ ವ್ಯವಸ್ಥೆ ಇರುತ್ತೆ. ಸತ್ತ ಮೇಲೆ ದೇಹದ ರಕ್ಷಣಾ ವ್ಯವಸ್ಥೆ ದುರ್ಬಲವಾಗೋದ್ರಿಂದ ಆಗ ಬ್ಯಾಕ್ಟಿರಿಯಾಗಳ ಕಾರುಬಾರು ಜೋರಾಗುತ್ತೆ; ಹೀಗೆ ನಿರ್ಜೀವ ದೇಹದಿಂದ ದುರ್ನಾತ ಬರಲಾರಂಭಿಸುತ್ತೆ!