ಟಿ20 ಕ್ರಿಕೆಟ್ ನಲ್ಲಿ ಅತೀ ಹೆಚ್ಚು 50+ ರನ್ ಗಳಿಸಿದವರ ದಾಖಲೆ ಪಟ್ಟಿ

ಕ್ರಿಕೆಟ್ ನಲ್ಲಿ ಚುಟುಕು ಕ್ರಿಕೆಟ್ ಎಂದು ಕರೆಯಲಾಗುವ ಟಿ20 ಅಂತಾರಾಷ್ಟ್ರೀಯ ಕ್ರಿಕೆಟ್ ಮಾದರಿಯಲ್ಲಿ ಹುಬ್ಬೇರಿಸುವ ದಾಖಲೆ ನಿರ್ಮಿಸಿರುವ ಅನೇಕ ಆಟಗಾರರಿದ್ದಾರೆ. ಈ ಕ್ರಿಕೆಟ್ ಮಾದರಿಯಲ್ಲಿ ಅರ್ಧ ಶತಕ ಅಥವಾ ಶತಕ ಬಾರಿಸೋದು ಸುಲಭವಲ್ಲ. ಆದರೂ ಈ ಸಾಧನೆಯಾದಿಯಲ್ಲಿ ಸೈ ಎನಿಸಿಕೊಂಡವರಿದ್ದಾರೆ. 

ಹೆಮ್ಮೆಯ ಸಂಗತಿಯೆಂದರೆ ಅಂತಾರಾಷ್ಟ್ರೀಯ ಟಿ20ಯಲ್ಲಿ ಅತೀ ಹೆಚ್ಚು 50+ ರನ್ ಬಾರಿಸಿದವರ ಪಟ್ಟಿಯಲ್ಲಿ ಭಾರತೀಯರು ಅಗ್ರ ಸ್ಥಾನದಲ್ಲಿದ್ದಾರೆ. ಈ ಸಾಧನೆಗಾಗಿ ಆರಂಭಿಕ ಸ್ಥಾನದಲ್ಲಿ ಭಾರತದ ಮಾಜಿ ನಾಯಕ ವಿರಾಟ್ ಕೊಹ್ಲಿ ಮತ್ತು ಹಾಲಿ ನಾಯಕ ರೋಹಿತ್ ಶರ್ಮಾ ಇಬ್ಬರೂ ನಂ.1 ಸ್ಥಾನ ಪಡೆದುಕೊಂಡಿದ್ದಾರೆ.  

ಶುಕ್ರವಾರ (ನವೆಂಬರ್ 19) ರಾಂಚಿಯ ಜೆ.ಎಸ್.ಸಿ.ಎ. ಇಂಟರ್ ನ್ಯಾಷನಲ್ ಸ್ಟೇಡಿಯಂ ಕಾಂಪ್ಲೆಕ್ಸ್ ನಲ್ಲಿ ನಡೆದ ನ್ಯೂಜಿಲೆಂಡ್-ಭಾರತ ನಡುವಿನ ದ್ವಿತೀಯ ಟಿ20ಐ ಪಂದ್ಯದಲ್ಲಿ ಅರ್ಧ ಶತಕ ಬಾರಿಸುವುದರೊಂದಿಗೆ ರೋಹಿತ್ ಶರ್ಮಾ ಅವರು ಟಿ20ಐನಲ್ಲಿ ಅತೀ ಹೆಚ್ಚು ಬಾರಿ 50+ ರನ್ ದಾಖಲೆ ಪಟ್ಟಿಯಲ್ಲಿ ಕೊಹ್ಲಿ ಜೊತೆಗೆ ಅಗ್ರ ಸ್ಥಾನ ಹಂಚಿಕೊಂಡಿದ್ದಾರೆ. 

ಭಾರತ ಪರ ಆರಂಭಿಕರಾಗಿ ಆಡಿದ್ದ ಹಿಟ್ ಮ್ಯಾನ್ ಖ್ಯಾತಿಯ ರೋಹಿತ್, ಕೇವಲ 36 ಎಸೆತಗಳಲ್ಲಿ 55 ರನ್ ಕಲೆ ಹಾಕಿದರು. ಈ ಮೂಲಕ ಶರ್ಮಾ ಟಿ20ಐನಲ್ಲಿ ಅತೀ ಹೆಚ್ಚು 50+ ರನ್ ದಾಖಲೆ ಪಟ್ಟಿಯಲ್ಲಿ ಮೊದಲ ಸ್ಥಾನಕ್ಕೇರಿದ್ದಾರೆ. ಈ ದಾಖಲೆ ಪಟ್ಟಿಯಲ್ಲಿ ಮೊದಲ ಸ್ಥಾನದಲ್ಲಿರುವ ವಿರಾಟ್ ಮತ್ತು ರೋಹಿತ್ ಇಬ್ಬರೂ 29 ಬಾರಿ 50+ ರನ್ ದಾಖಲೆ ಹೊಂದಿದ್ದಾರೆ.  

ಟಿ20ಐ ಕ್ರಿಕೆಟ್ ನಲ್ಲಿ ಅತೀ ಹೆಚ್ಚು ಬಾರಿ 50+ ರನ್ ಬಾರಿಸಿದವರ ಪಟ್ಟಿ 

1. ವಿರಾಟ್ ಕೊಹ್ಲಿ, ಭಾರತ, 29 ಬಾರಿ 50+ ರನ್ 

2. ರೋಹಿತ್ ಶರ್ಮಾ, ಭಾರತ, 29 ಬಾರಿ 50+ ರನ್ (4 ಬಾರಿ ಶತಕ) 

3. ಬಾಬರ್ ಅಝಾಮ್, ಪಾಕಿಸ್ತಾನ, 25 ಬಾರಿ 50+ ರನ್ (1 ಬಾರಿ ಶತಕ) 

4. ಡೇವಿಡ್ ವಾರ್ನರ್, ಆಸ್ಟ್ರೇಲಿಯಾ, 22 ಬಾರಿ 50+ ರನ್ (1 ಬಾರಿ ಶತಕ) 

ಶುಕ್ರವಾರ ನಡೆದ ಭಾರತ-ನ್ಯೂಜಿಲೆಂಡ್ ದ್ವಿತೀಯ ಟಿ20ಐ ಪಂದ್ಯದಲ್ಲಿ ಟಾಸ್ ಸೋತು ಬ್ಯಾಟಿಂಗ್ ಗೆ ಇಳಿಸಲ್ಪಟ್ಟ ನ್ಯೂಜಿಲೆಂಡ್, 20 ಓವರ್ ಮುಕ್ತಾಯಕ್ಕೆ 6 ವಿಕೆಟ್ ಕಳೆದು 153 ರನ್ ಗಳಿಸಿತ್ತು. ಗುರಿ ಬೆನ್ನಟ್ಟಿದ ಭಾರತ, 17.2 ಓವರ್ ಗೆ 3 ವಿಕೆಟ್ ನಷ್ಟದಲ್ಲಿ 155 ರನ್ ಬಾರಿಸುವ ಮೂಲಕ ಪಂದ್ಯ ಜಯಿಸಿತು. ಈ ಗೆಲುವಿನೊಂದಿಗೆ ಟೀಮ್ ಇಂಡಿಯಾ ಮೂರು ಪಂದ್ಯಗಳ ಟಿ20ಐ ಸರಣಿಯಲ್ಲಿ 2-0ಯ ಗೆಲುವು ದಾಖಲಿಸಿದೆ. ಕಿವೀಸ್ ಇನ್ನಿಂಗ್ಸ್ ನಲ್ಲಿ 25 ರನ್ ಗೆ 2 ವಿಕೆಟ್ ಉರುಳಿಸಿದ್ದ ವೇಗಿ ಹರ್ಷಲ್ ಪಟೇಲ್ ಪಂದ್ಯಶ್ರೇಷ್ಠರೆನಿಸಿದರು.